#100fluencers: adin guztientzako ekitate digitala sustatzen duen kanpaina

Adineko pertsonentzako errealitate bat al da ekitate digitalerako eskubidea?

• Ostiral honetan, urriak 1, “Adinekoen Nazioarteko Eguna” ospatzen da, “adin guztientzako ekitate digitala”-ren lelopean.
• Matiak, #100Fluencers-en (www.100fluencers.eus) bitartez, lehentasun gisa ezartzen du adinekoentzako ekitate digitalari heltzea, mundu digitalean sarbide eta parte-hartze esanguratsua errazteko.
• Orain arte, Guuk, Air Liquide HealthCare, Wetak, Shernan eta Google bezalako entitateek konpromisoa hartu dute proiektuarekin.
• Matiako zentroetan bizi diren pertsonek ahotsa goratu dute eta adin guztietan ekitate digitala bermatzeko lan egin behar dela adierazi dute.
• Eten digitalak agerian uzten du adinekoen % 30ek oraindik ez dutela Internet erabili azken urtean, alfabetizazio digitalaren beharra mahai gainean jarriz.

Hori dela eta, errealitate horretaz jabetuta, eta adinekoen Nazioarteko Eguna dela eta, Matiako zentroetan bizi diren hainbat pertsonak beren ahotsak batu nahi izan dituzte, gure bizitzetan gero eta presentzia handiagoa duen ingurune birtual batean sartzea errazteko eskatuz, eta, horrela, Nazio Batuen urte honetarako aukeratutako leloak adierazten duen "adin guztietarako ekitate digitala" ziurtatzeko.

Adinekoak natibo digitalak ez badira ere, ezerk ez ditu eragozten ikasteko eta teknologia berri horien erabilera eta onurak egunerokotasunean txertatzeko. Adin guztietarako gizarteaz hitz egitea aukera-berdintasunaz eta eskubideez hitz egitea da, pertsona horiek egokitu behar duten eremu batean. Horretarako, honako hau eskatzen dute:

1. Mundu digitalean eta informazioan sartzea.
2. Ingurunearekin, munduarekin konektatzea.
3. Digitalki seguru sentitzea.
4. Beren pribatutasuna errespetatzea.
5. Egokitzen laguntzea eta ingurune berri horretan partaide izatea.

Gure protagonistek dioten bezala: gure mundua bere mundua ere bada. Beraien eskaera aintzat hartu dadila. Zor diegu, zor diogu elkarri.

Adineko pertsonek oraindik ez dute adin txikiagoko gainerako pertsonen sarbide eta presentzia bera bitarteko digitaletan. Horrek hainbat arrisku dakartza berekin, hala nola administrazio-kudeaketak egiteko zailtasuna, isolamendu-sentsazioa, bakardade-sentsazioa... Baina pobretzea ere badakar gainerako gizartearentzat, adineko pertsonen esperientziak eta ezagutzak ingurune digitalean ez baitira ikusten.

#100fluencers: proiektu bat, hiru bloke
MatiaZaleak diseinatutako ekimen honek hiru bloke ditu, eta ezin hobeto kokatzen da Nazio Batuek "adineko Pertsonen Nazioarteko Eguna" dela-eta proposatutako leloan: "Adin guztientzako ekitate digitala".
Alde batetik, sare sozialek erakusten dituzten zahartzearen estereotipoen azterketa egingo da. Horretarako, Matia Institutuak azterlan bat egingo du, zahartzearekin lotutako etiketak eta estereotipoak eta sare sozialetan, komunikabide digitaletan eta literatura zientifikoan duten bilakaera aztertzeko.
Bigarren blokean, adinekoak Informazioaren eta Komunikazioaren Teknologietan (IKT) nola hornitu eta gaitu landuko da. Pandemiak bultzada handia eman dio eten digitalaren murrizketari. Baina oraindik ere badira Internetera konektatu ezin diren eta informatzeko eta komunikatzeko teknologiak erabiltzen ez dakiten pertsonak, eta batez ere adinekoak. Horrela, gero eta digitalizatuagoa den errealitate batetik kanpo geratzen dira (administrazioarekiko izapideak, online banka, Sare Sozialak...), eta bakartasun- eta isolamendu-egoeren eraginpean jartzen dira. Azken batean, eten digitalaren ondorioz, adineko askok ezin dute mediku-hitzordua eskatu edo familiarekin komunikatu.
Eta, azkenik, #100fluencers programaren helburua zahartzearen begiradei buruz sentsibilizatzea da. Horretarako, gaurtik aurrera, hainbat belaunaldiren arteko elkarrizketak islatzen dituzten bideoak zabaltzen hasiko dira, zahartzeak zer esan nahi duen, zer estereotipo dauden, zer erabilera ematen diegun... Hori guztia, guztiok mundu digitalaren parte izatearen garrantziaz gizartea kontzientziatzeko eta, era berean, zahartzearen kontzeptuari ikuspegi positibotik balioa emateko.

Kanpainaren bideo nagusia: 

Prentsa oharra: Dokumentua ikusi